1996-жылдан баштап милдеттүү мамлекеттик социалдык камсыздандыруу максаттары үчүн жарандарды персонификациялык эсепке алуу системасы киргизилген. Социалдык фонддо жекече эсепке алуунун бирдиктүү маалыматтык базасы түзүлгөн, анда ар бир жеке индивидуалдык номерге (ПИН) өздүк камсыздандыруу эсеби ачылат. Бул жекече номерде эмгек акысы, 1996-жылдан тартып эсептелген жана төлөнгөн камсыздандыруу төгүмдөрү жөнүндө маалыматтар топтолот. Өздүк камсыздандыруу эсеби пенсияларды борборлоштуруп чектөөдө жана кайра эсептөөдө, пенсияларды индексациялоодо колдонулат.

Азыркы кезде Кыргыз Республикасынын калкынын 90% жекече эсепке алуу менен камтылган. 4,791 млн. адам 14 сандуу ПИНдин негизинде идентификацияланган жана бул сандар жарандын өмүрүнүн акырына чейин өзгөрүлбөйт. ЖИН түзүү технологиясы номердин өзгөчөлүгүн камсыздайт. ПИНдин 14 сандуу түзүмдүк бөлүктөрү жөнөкөй алгоритмдердин жардамы менен өзгөчө эсептелип чыгарылган жана өзгөрүлбөй турган өздүк номерди түзүүгө мүмкүндүк берет.

2004-жылдан тартып ПИН бала төрөлгөндөн баштап ыйгарылып келет. Жекече эсепке алууда катталган жарандардын контингенти ар түрдүү– бул эмгекке жарамдуу жарандар, мектепке чейинки жана мектеп курагындагы балдар, студенттер, расмий катталган жумушсуздар, аскер кызматчылары, пенсионерлер ж.б.

Ошондой эле, ПИН жалпы жарандык паспорт, ID-кард, толук эмес билими жөнүндө күбөлүк, аттестат сыяктуу мамлекеттик маанидеги документтерге да коюлат.

ПИН көптөгөн министрликтер жана ведомстволор үчүн негизги номерлерден болуп, ички ведомстволук маалымат базасын түзүүдө колдонулууда: 

- КРӨ караштуу Мамлекеттик каттоо кызматы (КР МКК) паспортторду даярдоодо жарандарды идентификациялоо үчүн;

- КРӨ караштуу Милдеттүү медициналык камсыздандыруу фонду медициналык кызматтарга жеңилдиктерди берүүдө бейтаптарды идентификациялоо жана камсыздандыруу статусун аныктоо үчүн;

- КРӨ караштуу Мамлекеттик салык кызматы (МСК) салык төлөөчүлөрдүн маалымат базасын түзүүдө; 

- Шайлоолорду жана референдумдарды өткөрүү боюнча КР Борбордук шайлоо комиссиясы (КР БШК) шайлоочулардын маалымат базасын түзүүдө; 

- КР Билим берүү министрлиги аттестаттарды, толук эмес билим жөнүндө күбөлүктөрдү берүүдө;

- КР Калкты социалдык жактан коргоо министрлиги социалдык жөлөкпулдарды берүүдө;

- КР Жаштар, эмгек жана маданият министрлиги жөлөкпулдарды берүүдө.

Ошентип, бүгүнкү күндө Социалдык фондунун жекече эсепке алуу маалыматтык базасы жеке пенсиялык эсептер боюнча маалымат базасы гана болбостон, бардык эле министрликтер жана ведомстволор тарабынан колдонулуп келүүдө.

Ушуга байланыштуу, ар бир жаран өзүнүн жеке камсыздандыруу жана топтоо эсептерин контролдоо максатында интернет тармагы боюнча ал маалыматтарга кирүү мүмкүнчүлүгүн жеңилдетип, жекече эсепке алуу маалымат базасынын маанисин жана ишин күчөтүү белгиленүүдө.

Мындан сырткары, пенсиялык системанын ишин өркүндөтүү алкагында камсыздандыруу төгүмдөрүн төлөөчүлөр жана пенсия дайындоо үчүн отчетторду тапшыруу процессин болушунча жеңилдетүү жана тездетүү максатында Социалдык фонд органдарынын маалыматтык-техникалык камсыздоо боюнча иштерин өркүндөтүү боюнча бир катар чаралар каралууда.