Азыркы мамлекеттик социалдык камсыздандыруу системасында бир топ көйгөйлөр бар жана алардын бири экономиканын уюшулган секторун т.а., айылдык товар өндүрүүчүлөрдү жана жеке ишмердик ишин жүргүзгөн адамдарды социалдык камсыздандыруу менен туура камтуу. Алар республиканын иштеп жаткан калкынын 40 пайызын түзсө да, бардык түшкөн төгүмдөрдүн болгону 3 пайызын төлөшөт.

Бул  жагдай камсыздандыруу төгүмдөрүнүн алар үчүн белгиленген төмөн тарифтери менен шартталган. Ушундан улам, пенсиялык системанын теңдиги бузулууда, мисалы орто мектептин мугалими бир жыл камсыздандыруу стажын иштеп табуу үчүн орто эсеп менен 25000 сом төлөсө, айылдык товар өндүрүүчүлөр болсо ошол эле мезгил үчүн болгону 350 сом төлөшөт, ал эми ар бир чарбанын мүчөсүнө жерлер азыраак бөлүнгөн түштүк областтарда андан да аз - 30 сом өлчөмүндө төгүмдөр төлөнөт.

Ошону менен бирге, айылдык товар өндүрүүчүлөр пенсиялык системага жалпы түшкөн камсыздандыруу төгүмдөрүнүн болгону 1% салымын кошушса да, системанын баардык пенсиялык төлөөлөрүнүн 36% каражаттарын алышат.

Ушундай эле абал өз алдынча иштеген адамдарда да кездешет, мисалы базарда иштеген жаран орто эсеп менен жылына 960 сомдон 2400 сомго чейин төгүмдөрдү төлөйт, ачыгын айтканда, ушул сумманы да үзгүлтүккө учуратып төлөшөт.

Өзүңүздөр билгендей, биздин базарларда иштегендердин арасында абдан бай адамдар да бар, алар пенсияңардын бизге кереги жок деп эле ачык айтышат. Бизди ошол эле мугалимдер жана дарыгерлер менен салыштырууга болбойт, анткени биз мамлекеттен эмгек акы алып отурбайбыз, жана баардык учурда банкрот болуу тобокелчилигибиз бар дешет. Чынында эле банкрот болуп калышса, улгайганда эмне болушат? Алар эмгек акы албагандыгы үчүн жана кирешеси туруктуу эмес болгону үчүн биз аларга  уюушулган сектордо иштегендерге караганда камсыздандыруу төгүмдөрүнүн төмөн тариф чендерин сунуштоодобуз. Алар келечекте жок дегенде жашоо минимумунун деңгээлиндеги пенсия менен камсыз болушу үчүн канча өлчөмдө камсыздандыруу төгүмдөрүн төлөшү керектигин эсептеп чыгып, өздөрүн камсыздандырып коюуну сунуштап жатабыз. Өлкөдө бай адамдар болсо да, алардын бирөө да пенсиядан баш тартыша элек.