«Кыргыз Республикасында мамлекеттик социалдык камсыздандыруу боюнча пенсиянын топтоо бөлүгүн каржылоо үчүн каражаттарды инвестициялоо жөнүндө» Кыргыз Республикасынын Мыйзамына  ылайык Кыргыз Республикасынын Социалдык фонду 2015-жылдын 31-декабрына чейин камсыздандырылган жарандардын пенсиялык топтоо каражаттарына ишенимдүү башкаруу жүргүзөт жана мамлекеттик баалуу кагаздар менен коммерциялык банктардын депозиттерине инвестициялайт. 2016-жылдан баштап камсыздандырылган адамдар өз пенсиялык топтоолорун өз алдынча башкарууга укуктуу болушат. Мында алар башкаруучу компанияны же топтолмо пенсиялык фондду тандап алууга тийиш. Бул укукту ишке ашыруу тартиби «Камсыздандырылган адамдардын топтолмо пенсиялык фондду же башкаруучу компанияларды тандоо укугун ишке ашыруу жөнүндө» Кыргыз Республикасынын Өкмөтүнүн 2015-жылдын 25-майындагы №316 токтому менен бекитилген.

Кыргыз Республикасынын Өкмөтү бекиткен талаптарга жана ченемдерге жооп берген топтолмо пенсиялык фонддор жана башкаруучу компаниялар гана пенсиялык топтоолорду башкарууга укуктуу.

Кыргыз Республикасынын Өкмөтүнүн 2015-жылдын 15-февралындагы №98 токтому менен бекитилген Кыргыз Республикасында топтолуучу пенсиялык системаны өнүктүрүү боюнча иш-чаралардын планына ылайык он бир ченемдик укуктук актыны иштеп чыгуу каралган. Анда пенсиялык топтолуучу каражаттарды инвестициялоо процессинде субъекттердин  өз ара аракеттенүүлөрү, ошондой эле  пенсиялык топтоолор менен иштөөдө финансылык рыноктун катышуучуларына талаптар белгиленет. Аларды Кыргыз Республикасынын Өкмөтүнө караштуу Финансылык рынокту жөнгө салуу жана көзөмөлдөө мамлекеттик кызматы иштеп чыгат.

Бүгүнкү күндө  башкаруучу компаниянын жана депозитарийдин өз жоопкерчилигин камсыздандыруучу компаниялар менен милдеттүү камсыздандыруу келишимин түзүү тартиби Кыргыз Республикасынын Өкмөтү тарабынан бекитиле элек.

Жогоруда баяндалгандарды жана пенсиялык топтоо каражаттарын инвестициялоо боюнча Социалдык фонддун жакшы натыйжаларын эске алып, «Кыргыз Республикасында мамлекеттик социалдык камсыздандыруу боюнча пенсиянын топтоо бөлүгүн каржылоо үчүн каражаттарды инвестициялоо жөнүндө» Кыргыз Республикасынын Мыйзамына  өзгөртүүлөрдү киргизүү тууралуу» Кыргыз Республикасынын Мыйзамынын долбоору иштелип чыкты.

Долбоор менен пенсиялык топтоолорду ишеним башкарууну 2016-жылдын аягына чейин Кыргыз Республикасынын Социалдык фондуна калтыруу белгиленет. Бул мезгил пенсиялык топтоо каражаттарына ишенимдүү башкаруу келишими жана депозитарийдин кызмат көрсөтүүлөрүнө келишимди түзүү, конкурстарды уюштуруу жана камсыздандырылган адамдар тарабынан  башкаруучу компаняларды же топтолмо пенсиялык фонддорду тандоо мезгили. Аталган мезгил ичинде Кыргыз Республикасынын Социалдык фонду конкурстарды уюштуруу жана өткөрүү үчүн олуттуу даярдык көрүүгө тийиш.

Жалпыга маалымдоо каражаттарында кеңири маалыматтык компанияларды уюштуруу, ведомстволор аралык конкурстук комиссияны түзүү, конкурстун катышуучулары – башкаруучу компаниялар жана депозитерийлер үчүн конкурстук документацияларды даярдоо жана мыйзамдын талаптарына ылайык  конкурстарды уюштуруу зарыл.

Ошону менен бирге эле  Социалдык фонд камсыздандырылган адамдардан топтолмо пенсиялык фондду же башкаруучу компанияларды тандоо тууралуу арыздарды кабыл алууга, жарандардын пенсиялык топтоолорун жеке финансылык түзүмдөргө даректүү өткөрүп берүүдө камсыздандырылган адамдардын арыздарын жекече эсепке алууга жана иштеп чыгууга тийиш.

2017-жылдын 1-январынан тартып камсыздандырылган адамдар өздөрүнүн пенсиялык топтоолорун андан ары инвестициялоо үчүн башкаруучу компанияларга же мамлекетттик эмес топтолмо пенсиялык фонддорго арыз берүү тартибинде өткөрүүгө мүмкүнчүлүк берилет. Топтолмо пенсиялык фондду же башкаруучу компанияларды  тандабаган камсыздандырылган адамдардын  пенсиялык топтоолору Кыргыз Республикасынын Мыйзамдарына ылайык андан ары инвестициялоо үчүн Мамлекеттик пенсиялык топтоо фондунда калат.