2010-жылдын 1-январынан баштап  экономиканын уюшулган секторунда иштеген кызматкерлердин бардык категориясы үчүн Кыргыз Республикасынын пенсиялык системасына милдеттүү топтолмо элемент киргизилди.

         Бирок 2012-жылдын 1-январынан тартып Мамлекеттик пенсиялык топтоо фондуна камсыздандыруу төгүмдөрүн милдеттүү төлөөдөн пенсионер-кызматкерлер жана 1964-жылдын 1-январынан мурда төрөлгөн эркек-кызматкерлер жана 1969-жылдын 1-январынан мурда төрөлгөн аял-кызматкерлер бошотулган.

         Пенсиянын топтолмо бөлүгү (пенсиялык топтоолор) камсыздандырылган адамдын камсыздандыруу төгүмдөрүнүн 2 % өлчөмүндө Мамлекеттик пенсиялык топтоо фондуна төлөгөн милдеттүү эсебинен түзүлөт. Төлөнгөн камсыздандыруу төгүмдөрү жана пенсиялык топтоолору камсыздандырылган адамдын КР Социалдык фондунун жекече эсепке алуу системасындагы жеке камсыздандыруу эсебинин топтолмо бөлүгүнө киргизилет.

         Пенсиялык топтолгон каражаттар камсыздандырылган адамдардын менчиги болуп эсептелет, башка деңгээлдеги бюджетке алынбайт, күрөөнүн жана башка милдеттемелердин предмети болуп саналбайт.

         Социалдык фонд камсыздандырылган адамдардын пайдасына инвестициялык киреше алуу максатында алардын пенсиялык топтоолорун мыйзамда белгиленген финансылык инструменттерге милдеттүү түрдө инвестициялайт. Азыркы кезде КР Социалдык фондуна пенсиялык топтолгон каражаттарды мамлекеттик баалуу кагаздарга, камсыздалган облигацияларга (күрөөлүк), жергиликтүү өз алдынча башкаруу органдарынын облигацияларына, ипотекалык баалуу кагаздарга жана коммерциялык банктардын депозиттерине инвестициялоого уруксат берилген. Пенсиянын топтолмо бөлүгүнө  төлөнгөн төгүмдөрдөй эле алынган кирешелер да жарандардын жеке эсептеринде чагылдырылат жана алардын пенсиялык топтоолорун толуктоого шарт түзөт.

         2016-жылдын январынан баштап камсыздандырылган жарандар пенсиялык топтоолорун башкаруу үчүн башкаруучу компанияны тандоого же пенсиялык топтоолорун мамлекеттик эмес пенсиялык фонддорго которууга укуктуу болушту. Социалдык фонд башкаруучу компанияларды же пенсиялык фондду тандай элек жарандардын пенсиялык каражаттарын башкарууну улантат.

         2013-жылдын январынан тартып пенсиялык куракка жетип, пенсия алууга кайрылган жарандарга, иштеген пенсионерлерге, Кыргызстандан башка өлкөгө туруктуу жашоого кетип жаткан камсыздандырылган адамдарга, каза болгон камсыздандырылган адамдардын мураскорлоруна пенсиялык топтолгон каражаттары төлөнө баштады. Камсыздандырылган жарандарга төлөмдөр Кыргыз Республикасынын Өкмөтүнүн 2012-жылдын 25-октябрындагы № 745 токтому менен бекитилген Кыргыз Республикасынын Социалдык фонду тарабынан Мамлекеттик пенсиялык топтоо фондунун пенсиялык топтолгон каражаттарын төлөп берүү Эрежелеринде көрсөтүлгөн тартипте жүргүзүлөт.

         Мыйзам боюнча пенсиянын топтоо бөлүгүнө экономиканын уюшулган секторунда иштеген кызматкерлерден сырткары  башка жарандар да катыша алат. Мында Мамлекеттик пенсиялык топтоо фондуна камсыздандыруу төгүмдөрүн ыктыярдуу төлөө үчүн камсыздандыруу полистерин сатып алууга мүмкүнчүлүктөрү бар.